Կատարի Պետությունում ՀՀ դեսպան Գեղամ Ղարիբջանյանի հանդիպումը ԿՊ ԱԳՆ գլխավոր քարտուղարի հետ

13 սեպտեմբերի, 2019

Սեպտեմբերի 11-ին Կատարի Պետությունում ՀՀ դեսպան Գեղամ Ղարիբջանյանը Կատարի արտգործնախարարությունում հանդիպեց ԿՊ ԱԳ գլխավոր քարտուղար դոկտոր Ահմադ Հասան Ալ-Համադիի հետ։

Դեսպան Ղարիբջանյանը շնորհակալություն հայտնեց կատարցի զրուցակցին՝ դեսպանության աշխատանքների ակտիվ և շարունակական օժանդակության համար և հույս հայտնեց, որ մոտ ապագայում Երևանում ևս Կատարի Պետության դեսպանություն կբացվի։

Գլխավոր քարտուղար դոկտոր Ալ-Համադին ընգծեց, որ անհրաժեշտ է առավել ակտիվացնել երկկողմ շփումները և փոխայցելությունները տարբեր մակարդակներում, ինչպես նաև նշեց, որ հրավերի դեպքում կցանկանար այցելել Հայաստան՝ ՀՀ ԱԳՆ իր գործընկերոջ հետ ծանոթանալու նպատակով։

Կողմերը պայմանավորվեցին ակտիվացնել փոխադարձ այցելությունների ուղղությամբ տարվող աշխատանքները։ Քննարկվեց նաև երկու երկրների ԱԳ փոխնախարարների մակարդակով և համակարգող վարչությունների պետերի մասնակցությամբ քաղաքական խորհրդակցություններ անցկացնելու հնարավորությունը։

Գոհունակությամբ նշելով երկու երկրների միջև առկա քաղաքական հարաբերությունների բարձր մակարդակը, կողմերը կարևորեցին նաև առևտրատնտեսական կապերի ակտիվացման և խորացման հրամայականը։

Երկուստեք կարևորվեց իրավապայմանագրային դաշտի ընդլայնման հրամայականը։ Մասնավորապես դեսպան Ղարիբջանյանն անդրադարձավ ՀՀ քաղաքացիների համար մուտքի արտոնագրի պահանջի չեղարկման հարցի կարևորությունը, ինչին ի պատասխան դոկտոր Ալ-Համադին ասաց, որ կատարական կողմը դրական է տրամադրված։

Հանդիպմանը մասնակցում էր դեսպանության երկրորդ քարտուղար Լևոն Պետրոսյան։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր